കോവിഡ് ബാധിച്ച് ചികിത്സയ്ക്കുശേഷം വിമുക്തി നേടിയ യുവാവിന് വീണ്ടും രോഗബാധ സ്ഥിരീകരിച്ചു. ആമപ്പാറ സ്വദേശിയായ ഇരുപതുകാരനെ മഞ്ചേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
കഴിഞ്ഞമാസം 30ന് ആണ് ആന്റിജന്‍ പരിശോധനയില്‍ യുവാവിന് പോസിറ്റീവായത്. ചികിത്സയില്‍ കഴിയുന്നതിനിടെ നെഗറ്റീവായതിനെ തുടര്‍ന്ന് കഴിഞ്ഞ10ന് വീട്ടില്‍ തിരിച്ചെത്തുകയായിരുന്നു. നിരീക്ഷണത്തില്‍ കഴിയുന്നതിനിടെ 18ന് ശ്വാസംമുട്ടല്‍ ഉണ്ടായതിനെ തുടര്‍ന്ന് മഞ്ചേരിയില്‍ പോയി പരിശോധന നടത്തി.
വീട്ടില്‍ കഴിയുന്നതിനിടെയാണ് വീണ്ടും പോസിറ്റീവാണെന്ന ഫലം കഴിഞ്ഞദിവസം വന്നത്. യുവാവ് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. യുവാവുമായുള്ള സമ്പര്‍ക്കം വഴി 19 പേര്‍ക്കു കോവിഡ് സ്ഥിരീകരിച്ചിരുന്നു.
കഴിഞ്ഞ ദിവസം ഹോങ്കോങ്ങില്‍ നിന്ന് സമാനമായ വാര്‍ത്ത വന്നിരുന്നു. കോവിഡ് മുക്തനായി നാലു മാസത്തിനു ശേഷമാണ് ഹോങ്കോങ് സ്വദേശിയായ യുവാവിന് വീണ്ടും രോഗബാധയുണ്ടായത്.
